"Cənubi Koreya silahlarının Ukraynaya tədarükü üçün Koreya Respublikasının Milli Assambleyası (Parlament) tərəfindən təsdiq tələb olunacaq".

Bizimyol.info xəbər verir ki, bunu "Yonhap" agentliyinin təşkil etdiyi “Koreya yarımadasının gələcəyi” simpoziumunda onun spikeri Vu Von-suk deyib.

“Bu yaxınlarda hökumət Rusiya ilə Şimal arasındakı razılaşmaya cavab olaraq Ukraynaya silah tədarükü məsələsinə yenidən baxdığını açıqlayıb. Cənubi Koreya-ABŞ-Yaponiya birgə “Freedom Edge” təlimi ilə bağlı müxtəlif fikirlər var. Silahların təhvil verilməsi və ya hərbi ittifaq parlamentin razılığı və ratifikasiyası tələb edəcək”, - deyə o qeyd edib.

Spikerin sözlərinə görə, Koreya yarımadası ətrafında təhlükəsizlik vəziyyəti ciddidir və onun narahatlığına səbəb olur: "Ancaq biz sakit olmalı və vəziyyətə real baxmalıyıq", - deyib. Hazırkı forum Koreya Respublikası, ABŞ və Yaponiya arasında üçtərəfli əməkdaşlığa həsr olunub.

“Diplomatiyada tarazlığı saxlamalıyıq, bu bizim sağ qalma yolumuzdur. Bütün əvvəlki administrasiyaların izlədiyi balanslaşdırılmış diplomatiya unudulmamalıdır”, - deyə parlament sədri qeyd edib. O vurğulayıb ki, Koreya yarımadasında təsadüfi sərhəd toqquşmaları “tam hüquqlu müharibəyə” gətirib çıxara bilər.

İyunun 20-də Koreya Respublikası Prezident Administrasiyasının Milli Təhlükəsizlik Departamentinin rəhbəri Çanq Ho-jin bildirib ki, hakimiyyət Ukraynaya birbaşa silah tədarükü məsələsinə yenidən baxacaq.

İyunun 19-da Rusiya prezidenti Vladimir Putinin Pxenyana səfəri zamanı Rusiya Federasiyası ilə KXDR arasında müdafiə müharibəsi baş verəcəyi təqdirdə dərhal hərbi yardımın göstərilməsini nəzərdə tutan Hərtərəfli Strateji Tərəfdaşlıq Sazişi imzalanıb.

Qadir, Bizimyol.info