Amerika Birləşmiş Ştatları Ukraynaya təkcə Xarkov bölgəsi yaxınlığında yerləşən qüvvələri deyil, sərhədi keçərək hücum edən istənilən Rusiya qüvvələrini məğlub etmək üçün Amerika silahlarından istifadə etməyə icazə verib.
Bizimyol.info xəbər verir ki, bu barədə “Politico” yazıb. Eyni zamanda, ABŞ rəsmiləri qeyd edirlər ki, bu, Vaşinqtonun ABŞ-ın verdiyi silahlarla Rusiyanın dərinliklərinə zərbə endirilməsinin qadağan edilməsi ilə bağlı siyasətində dəyişiklik deyil.
Birləşmiş Ştatlar Xarkov vilayəti ilə sərhədə yaxın hədəflərə zərbələr endirməsinə icazə verdiyi vaxtdan Ukrayna qoşunları Rusiya ərazisini vurmaq üçün ən azı bir dəfə Amerika silahlarından istifadə edib. Daha sonra Belqorod vilayətindəki hədəflər məhv edilib. Lakin Ukrayna və digər Avropa rəsmiləri Birləşmiş Ştatlara məhdudiyyətləri daha da yumşaltmaq üçün təzyiq göstəriblər ki, bu da Ukraynaya Rusiyanın istənilən yerində hədəfləri vurmağa imkan verir.
Milli təhlükəsizlik üzrə müşaviri Ceyk Sallivan "PBS" telekanalına müsahibəsində deyib ki, ABŞ-ın Rusiyaya zərbələri ilə bağlı Ukrayna ilə razılaşma “Rusiya qoşunlarının daha çox Ukrayna ərazisini ələ keçirməyə cəhd etmək üçün Rusiya tərəfdən sərhədi keçərək Ukrayna tərəfinə keçdiyi istənilən yeri” əhatə edir. “Bu, coğrafiya məsələsi deyil, bu, sağlam düşüncə məsələsidir. Əgər Rusiya öz ərazisindən Ukraynaya hücum edərsə və ya hücum etmək üzrədirsə, Ukraynaya sərhəddən ona hücum edən qüvvələri dəf etməyə icazə vermək yalnız məntiqlidir”, - deyib.
Anonimlik şərti ilə danışan iki amerikalı məmur vurğulayıb ki, Ukraynanın “sərhədin istənilən yerindən atəşə cavab olaraq” Rusiya ərazisinə zərbələr endirməsinə icazə verilməsi Ağ Evin siyasətində dəyişiklik deyil.
Rəsmilərdən biri bildirib ki, bu addım ilkin olaraq yalnız Rusiyanın Xarkov hücumu kontekstində nəzərdən keçirilib, lakin bu, digər transsərhəd hücumlara cavab olaraq zərbələrin mümkünlüyünü istisna etmir.
Qərb silahlarından istifadə etməklə Rusiya ərazisindəki hədəflərə zərbələr endirməyə icazə verən təkcə ABŞ deyil. Bu qərarı Almaniya da dəstəkləyib. Kansler Olaf Şolz vurğulayıb ki, Ukrayna öz ərazisinə edilən hücumlara qarşı özünü müdafiə etmək hüququna malikdir.
Bundan əvvəl Fransa prezidenti Emmanuel Makron Rusiya Federasiyasına hücumlar üçün Ukraynaya uzaqmənzilli silahların verilməsini dəstəkləyib. O, həmçinin Ukraynanın işğalçıların Ukrayna şəhərlərinə hücum etdiyi Rusiya ərazisindəki hərbi obyektlərə zərbələr endirməsinə icazə verilməsini istəyib.
Bundan əlavə, Polşa, Çex, Litva, Latviya, Estoniya, Böyük Britaniya, Danimarka və bir sıra digər ölkələrdə Rusiya Federasiyasına Qərb silahları ilə zərbə endirmək icazəsini dəstəkləyib.
Qadir, Bizimyol.info
