ABŞ-ın keçmiş prezidenti Donald Tramp Nyu-York məhkəməsində münsiflər heyətinin təqsirli hökmü çıxarıldıqdan sonra ABŞ Konqresinin Respublikaçılar Partiyasından olan üzvlərinin onun müdafiəsində daha fəal çıxış edəcəklərinə və “demokrat düşmənlərinə” hücum edəcəyinə ümid edib.

Bizimyol.info xəbər verir ki, bu barədə “Rolling Stone” jurnalı mənbələrə istinadən yazır.

"Mənə fəaliyyət lazımdır", - deyə iddialara görə, eks-prezident yaxın adamları ilə görüşündə bildirib. Nəşrin adını açıqlamadığı həmsöhbətlərindən birinin sözlərinə görə, bu, Trampın ilk belə bəyanatı deyil – o, bu ayın əvvəlində "qəzəbli və söyüşdən istifadə edərək" respublikaçı qanunvericilərdən "ABŞ prezidenti Co Baydenin administrasiyasının cəzalandırılması" üçün daha qətiyyətli addımlar atmağı tələb edib. Trampın sözlərinə görə, ölkə rəhbərliyi onu siyasi təqib etmək üçün məhkəmə sistemindən istifadə edir.

İyunun əvvəlində "Axios" portalı mənbələrə istinadən xəbər vermişdi ki, Nümayəndələr Palatasındakı respublikaçılar Trampa qarşıdan gələn prezident seçkilərində qalib gələrsə, ona qarşı bəzi hüquqi prosesləri dayandırmağa imkan verə biləcək qanun layihəsi hazırlayır. Qanun layihəsi qismən Trampa Corciyada 2020-ci il prezident seçkilərini qanunsuz olaraq ləğv etməyə cəhddə ittiham edən işi federal məhkəməyə göndərməyə imkan verəcək. Belə olan halda seçkilərdə qalib gələn Tramp özünü əfv edə bilərdi.

Mayın 30-da Nyu-Yorkda münsiflər heyəti Trampı aktrisa Stormi Danielsə pul ödəyərkən "Trump Organisation"ın maliyyə qeydlərini saxtalaşdırmaqda günahkar bilib. Bu işə Nyu York ştatında baxılır, o da federal məhkəmə sisteminin bir hissəsi deyil. Trampa hökmün iyulun 11-də çıxarılması planlaşdırılır və onu 20 ilə qədər həbs gözləyir. ABŞ-ın keçmiş prezidenti barədə Kapitoliyə hücum və məxfi sənədlərin düzgün saxlanmaması da daxil olmaqla bir neçə ittihama məhkəmədə baxılması davam edir.

Qadir, Bizimyol.info