Prezident Cozef Baydenin təhlükəsizlik məsələləri üzrə müşaviri Cek Sallivan deyib ki, ABŞ Ukraynaya kassetli sursatların göndərilməsini təsdiqləyib.
Bu, sıradan bir hadisə deyil. Çünki kassetli sursatlar, kassetli bombalar qadağan olunub; 2008-ci ildə Dublində kassetli sursatların tətbiqi, ehtiyatının toplanması, istehsalı və ötürülməsinin qadağan olunması və onların məhv edilməsi barədə Konvensiya imzalanıb.
ABŞ, Rusiya, Çin kimi böyük dövlətlər bu Konvensiyaya imza atmayıb. Çünki özləri kassetli sursatların iri istehsalçılarıdır.
Əlbəttə, deyə bilərsiniz ki, ABŞ, Çin, Rusiya imzalamadığı Konvensiyaya görə məsuliyyət daşımır və yerinə yetirməyə borclu deyillər. Ona görə də Vaşinqtonun Ukraynaya kassetli sursatlar verməsinə görə Bayden Administrasiyasını heç kəs günahlandıra bilməz. Bəli, böyük güclər özlərini beynəlxalq hüquqdan üstün bilir. Bax, elə bu gün Avropa İttifaqının Xarici Siyasət və Təhlükəsizlik üzrə Ali Nümayəndəsi Cozep Borrel Dubrovnik Forumundakı çıxışında belə deyib:" ...biz güc siyasətinin mövcud olduğu dünyada yaşayırıq". Demək istəyib ki, hüququn gücü yoxdur, gücün hüququ var. ABŞ da kassetli sursatlarla bağlı qərarı bu mülahizəyə əsaslanaraq qəbul edib, bəlli!
Amma Rusiya, Çin və ABŞ axı BMT Təhlükəsizlik Şurasının daimi üzvləridirlər. Bu kontrastı necə izah edək?!
Dünyanın təhlükəsizliyinə cavabdeh olan dövlətlər özləri ən təhlükəli və ayrıca Konvensiya ilə yasaqlanmış beynəlxalq sazişi rədd ediblər. Ancaq ziddiyyət, belə adlandırıldığı kimi, ikili standart burda da bitmir. Əslində ortada bir standart da qalmır. Ən tragikomik moment ondan ibarətdir ki, 44 günlük Vətən müharibəsi zamanı həmin dairələr Azərbaycanı guya kassetli sursatlar tətbiq etməkdə günahlandırmağa çalışırdı. Əslində isə vəziyyət başqaydı və reallıq sözün bütün mənalarında göz qabağında idi; bütün hərbi əməliyyatlar az qala bütünlüklə real vaxt rejimində nümayiş olunurdu. Hamı görürdü ki, Azərbaycan Silahlı Qüvvələri legitim hədəfləri vurur. Həm də yüksəkdəqiqlikli raketlərlə. Mülki əhali və ya mülki infrastruktur hədəf seçilmir. Ancaq və ancaq hərbi məqsədlərlə əməliyyat aparılırdı. Ədalətdən və dürüstlükdən dəm vuran dairələr Ermənistan ordusunun döyüş zonasına heç bir dəxli olmayan Bərdə şəhərinin bazarına (!) atdığı gerçək kassetli raketləri "görmədilər", ancaq Azərbaycanın atmadığı raketin xəyalını gördülər.
Bu, artıq ikili standart da deyil. Hətta heç bir standart deyil. Bu, sadəcə, riyakar, ikiüzlülükdür. Bundan da daha çoxudur. Riyaziyyat da çoxüzlülər anlayışı var. Yəqin ki, odur. Başqa nə cür izah edəsən?! Dediyimiz kimi, dünən Azərbaycanı kassetli sursatlardan "istifadə etdiyinə' görə" ittiham etməyə çalışan Qərb bu gün özü Ukraynaya kassetli sursat verir. Bunun adını nə qoyaq?! Azərbaycanı günahlandırmaq istəyəndə kassetli bombalara "ölüm silahı" demişdilər, bu gün o silahı Ukraynaya "qoruyucu mələk" statusunda göndərirlər. Eyni yanaşma “Bayraktar”larla bağlı da olmuşdu: Azərbaycan istifadə edəndə “ölüm silahı” idi, Ukraynada dönüb “mələk” oldu.
Ukraynanın apardığı müharibəni öz ərazi bütövlüyü uğrunda mübarizə - haqlı müharibə kimi qəbul edənlər, Azərbaycanı öz torpaqlarının işğalı ilə barışmağa çağırırdılar. Azərbaycanın əraziləri işğal altında olanda Qərb: “Münaqişənin hərbi həlli yoxdur” deyirdi, Ukraynanın ərazisi işğal olunanda isə: “Münaqişənin sülh həlli yolu yoxdur, bu müharibə çox uzanacaq” deyirlər.
Çoxüzlü siyasətin ən sonuncu nümunəsini yenə Vaşinqton göstərdi; prezident Bayden: "Ukrayna NATO üzvlüyünə hələ hazır deyil" dedi və bunu "demokratiya çatışmazlığı" ilə izah etdi.
Çox qəribə açıqlamadır! Ölkəni özü boyda hədəfə, döyüş meydanına çeviriblər. Ukraynada əsaslı olaraq hərbi vəziyyətdir. Əhalinin az qala yarısı öz evində, hətta çox böyük bir hissəsi öz ölkəsində yaşamır artıq; qaçqın kimi Avropaya, Türkiyəyə və sair üz tutub gedib. Harda, hansı demokratiyadan danışırlar?! Ukraynanın müstəqil və bütöv ölkə kimi qalıb-qalmaması sual altındadır. Söhbət təkcə Rusiyanın hərbi təcavüzündən, işğalçılıq siyasətindən getmir. ABŞ prezidentinin son bəyanatı daha ağıllarda daha bir sual işarəsi yaratdı. Bayden dedi ki, Ukraynanın NATO-ya qəbul olunmasına razı deyil, ancaq ABŞ Ukraynanın təhlükəsizliyinə təminat verə bilər. Bu, o deməkdir ki, müharibə Ukraynanın öz problemidir, "vuruşur, vuruşsun, vuruşmaq istəmirsə, ölkəni versin bizə, Rusiya ilə vuruşarıq, ya barışarıq, özümüz bilərik".
Budurmu yəni?! Beynəlxalq güclərin çoxüzlü ədalətinin sonu budurmu?! Yoxsa biz səhv anlamışıq?!
![Bahəddin Həzi](https://www.bizimyol.info/az/wp-content/uploads/2020/10/Baheddin-Hezi.jpg)
Bahəddin Həzi, Bizimyol.info