“Baş nazir Nikol Paşinyanın 44 günlük müharibə ilə bağlı komissiyanın iclasında iştirakının bir neçə məqsədi var idi - bir daha fəlakətli məğlubiyyətə görə özünə haqq qazandırmaq, günahı əvvəlki hakimiyyətin üzərinə atmaq və özünü şəxsi piar etmək”.
Bizimyol.info xəbər verir ki, bu fikirləri Sputnik Ermənistan -a müsahibəsində politoloq Suren Surenyants deyib.
O, ilk növbədə görüşün təşkilinə ayrı-seçkilik yanaşmasına diqqət çəkib.
“Ermənistanın baş nazirindən əvvəl, məlum olduğu kimi, parlament komissiyasının üzvlərinin suallarını keçmiş xarici işlər naziri, Baş Qərargahın keçmiş və indiki rəisləri, aşağı rütbəli hərbçilər cavablandırıblar. Amma bütün bu görüşlər bağlı qapılar arxasında keçirilib və buna uyğun olaraq, ictimaiyyətin əvvəlki görüşlərdə deyilənlərlə bağlı hər hansı məlumatı yoxdur. Məsələn, Baş Qərargahın keçmiş rəhbəri Onik Qasparyanın nədən danışdığını heç kim öyrənə bilməyib və komissiyanın rəhbəri Andranik Köçəryanın özü də jurnalistlərin komissiyaya dəvət olunmuş şəxslərlə şəxsən əlaqə saxlamasına hər cür mane olub”, -deyə Surenyants bildirib.
Surenyantsın fikrincə, əgər görüşlərin bağlı qapılar arxasında keçirilməsi barədə qərar qəbul edilirsə, o zaman bu parametr hamı üçün keçərli olmalıdır.
Ümumiyyətlə, o, Paşinyanın çıxışının məzmununu başa düşmədiyini bildirib. Onun sözlərinə görə, komissiyanın vəzifəsi diplomatik, siyasi, hərbi və dövlət faktlarını birləşdirərək hansısa nəticəyə gəlməkdir. Məhz buna görə də indiyədək komissiya tərəfindən dəvət olunmuş və izahatlarını verən şəxslər açıqlanmamaq tələbi ilə imza atıblar.
"Bugünkü açıq iclasda yeni və hətta daha məxfi heç nə eşidilməyib. Yeganə "xəbər" o oldu ki, üçtərəfli bəyanatın bir neçə variantı var.Bu gün Paşinyanın vəzifəsi özünü şəxsi piarla təmin etmək olub. Bu, o qədər aydın görünür ki, heç bir şəkildə gizlətmək mümkün deyil.
Hökumət başçısı İctimai Televiziyanın resurslarından istifadə edərək, növbəti dəfə efirə çıxıb, ölkənin yaxın tarixini saxtalaşdırmaq, faktları təhrif etmək, manipulyasiya etmək, günahı bütün sələflərin üzərinə yıxmaq, özündən başqa hər kəsi günahkar etmək istəyib.
Əgər biz bütün bu hadisələrin şahidi olmasaydıq və bütün bu müddət ərzində Ermənistanda yaşamasaydıq, o zaman bizə elə gəlirdi ki, Dağlıq Qarabağ həqiqətən də 2018-ci ildən çox əvvəl təslim olub. Və Paşinyan sadəcə olaraq bütün bu hadisələrin təfərrüatlarından məxfilik pərdəsini açıb”,-deyə Surenyants əlavə edib.
Onun sözləinə görə, Paşinyan ötən illərin danışıqlar prosesini belə tutqun rənglərlə şişirdərək, cizgilərini çəkməklə sazişin ən pis variantını imzalamazdan əvvəl informasiya zəminini hazırlayır.
Parlament müxalifətinin fəaliyyətinə həvəs göstərməyən Surenyants onun iclasda iştirak etməmək qərarını haqlı sayır.
“Birincisi, hakimiyyətin əleyhdarları haqlıdırlar ki, məğlubiyyətin səbəbkarları bütün həqiqəti üzə çıxara bilməzlər və etməyəcəklər. İkincisi, inkişaf etmiş demokratiyaya malik ölkələrdə bu tipli komissiyalara adətən müxalifət rəhbərlik edir, çünki artıq hakimiyyətin əlində prokurorluq, istintaq strukturları və s. formasında mühüm rıçaqlar var. Komissiyalar isə hüquq-mühafizə orqanlarının əməkdaşlarının üzə çıxara bilmədiyi və ya açmaq istəmədiyi faktları üzə çıxarmaq üçün müxalifətin əlində alətə çevrilməlidir.
Və sonda Paşinyanın çıxışı şahidlik deyil, ictimai “nitq” idi və müxalifət istənilən halda məxfiliyinə görə əsas və prinsipial vacib məsələlərə toxuna bilməzdi”, -deyə o, qeyd edib.
Surenyants opponentlərin Paşinyan üçün siyasi gündəm “yaratmaq” istəməməsini düzgün hesab edir.
Xatırladaq ki, iyunun 20-də Ermənistanın baş naziri 44 günlük müharibənin araşdırılması üzrə müvəqqəti parlament komissiyasının iclasında iştirak edib. Müzakirə ilk dəfə olaraq açıq rejimdə keçirilib. Hökumət başçısı bütövlükdə “Dağlıq Qarabağ”ın itirilməsinin labüdlüyü ilə bağlı əvvəllər səsləndirilən tezisləri təkrarlayıb, noyabr bəyanatının imzalanmasının təfərrüatlarından danışıb.
Leyla Mirzə
